為什麼我們不要獨裁政權？-因為批評就是顛覆！維權就是抗法！
-
雖然我喺香港土生土長，但我從來無唔承認自己係中國人，縱使發生咗89年北京六四事件，我係痛心加憤怒，但無動搖過我係中國人嘅立場，97年我做緊旅遊，但我從來無申請BNO，我寧願暫時唔離開香港工作或旅遊，都要堅持等到當年第一批去申請特區護照，因為當時覺得終於可以擁有自己國家嘅護照。
但之後一路眼見自己國家愈富強就愈腐敗！愈先進就愈墮落！！
05年假雞蛋、假食鹽等等黑心食品，甚至08年三聚氰胺毒奶事件！最離譜係舉報者竟然被打！
到同年汶川地震，遲緩救災、校園工程偷工減料，導致大量學生死亡！但上訪求真相嘅家長竟然被打壓、被監視！受害人變成被告！！
維權人士譚作人發起調查豆腐渣工程，被以「煽動顛覆國家罪」被判刑，甚至香港新聞記者到大陸訪問譚作人，都被公安以藏毒為由強行衝入記者酒店房搜查。仲有，貪污救災物資、慈善捐款被貪污、被濫用等等等等。。完全將中國嘅腐敗淋漓盡致咁表現晒出嚟！再講～89年民運因為反革命受咗22年慘無人道冤獄嘅李旺陽，出獄後因受訪而被自殺！！跟住仲有銅鑼灣書店事件、出版商桂敏海被屈醉駕出事潛逃，喺泰國被失蹤事件等等。。。
中共港共政府的歪理羅輯：
批評就係顛覆？！
理論就係煽動？！
揭露就係造謠？！
維權就係抗法？！
反抗就係暴亂？！
表達訴求就係搞港獨？！
所有莫須有罪名都可以加諸你身上！！
以上種種相信每一個有留意香港新聞嘅香港人都應該知道！仍然支持政府今次修例嘅人莫非你真係覺得呢啲事將來唔會發生喺你或者你家人身上？！試問一個「人權」同「司法制度」 咁唔文明嘅極權政府，叫香港人點樣去接受？？ 點會唔擔心？？
點解嗰啲冥頑不靈，仲繼續喺度自high唔肯醒覺嘅所謂愛國愛港人士成日搬嗰套什麼「外國勢力論」出嚟。。講親都係嗰幾句什麼。。
「反對暴政就係唔愛國？！」
「追求自由民主就係崇英崇美？！ 」
「收美國佬錢搞亂香港？！」
「行得正、企得正、冇犯罪怕咩修例？！ 」
「反對修例嗰啲人根本就係身有屎？！」我覺得講呢堆說話嘅人簡直荒謬到極點 ！！
14年因為爭取真普選而產生嘅佔中運動，9月28號嘅黃昏，喺電視新聞親眼睇見警察向手無寸鐵表達訴求嘅市民近距離面對面噴胡椒噴霧，嗰一刻開始，極度氣憤嘅我由沉默嘅中間派，變成會行出嚟表達不滿嘅一份子。
雖然如此，我始終唔認同對警察使用暴力，因為佢哋只係緊守崗位，執行職務，只係有部分嘅警察濫用暴力。但佢哋唔係我哋嘅敵人，我哋針對嘅係呢個極權政府！針對呢個言而無信、厚顏無恥嘅畜牲「特醜」！！
