黃色經濟圈唔work?
-
被建制派潑冷水的黃色經濟圈, 講緊也有千億規模.
曾經有中立派講，其實消費唔應該分黃藍。但大家又有無發現，越高尚嘅餐廳就越藍，越親中，因為佢地要以維護自己嘅生意、利益。喺投票結果當中亦證明到山頂呢類高尚住宅區，依然都仲有一班保皇黨嘅支持者便知一二。其實大家嘅消費，一早已經分左藍黃。
但係，當親中嘅大集團、商家，發展走平民路線嘅商店餐廳，慢慢蠶食市民嘅日常生活，令到大家都覺得落街方便，無乜要求，咁咪食，咁咪買囉。漸漸形成左一種習慣，當爭取到市場佔有率之後就將小商戶迫退，然後大家以為好多選擇嘅時候，其實就係無選擇。
當大家話罷食美心嘅時候，先發現原來生活中有咁多成日幫襯嘅餐廳店舖，原來都係佢旗下 (2018年統計過有72個品牌)，而屋企公司附近往往都係充斥住呢D餐廳。以至大商場、領展、街舖都係根據地，就以太古城間Treats為例，當你以為成個food court咁多野揀，原來成個food court都係美心嘅。大集團慢慢已經控制哂大家嘅生活習慣，轉移以小店模式去運作：轉名、收購合作、分拆業務，務求令大家接觸到所有嘅衣食住行都可以係佢地嘅業務範圍。
有人問過一個問題：「如果叫D小朋友唔好食麥當勞，咁佢地仲可以食d乜野? 佢地要出去抗爭，最快最平就係食麥當勞。」首先，幾時都講，消費嘅選擇係你自己嘅，無人迫你。有人覺得黃絲用呢種方法去令到某d舖頭生存唔到，好可怕嘅手段，但係其實無人阻止藍絲去幫襯藍店。相反，其實藍絲係屬於無乜所謂嘅一群，正正就係嗰班貪平、貪方便，最緊要唔好阻住我搵食，我食完仲要返工嘅一群。唔緊要，無人阻止佢地繼續幫襯藍店，好公平嘅，佢地可以同樣用行動懲罰店舖。只不過，從人龍嘅長度，我地會睇到民意喺邊一邊。
所以翻返黎小朋友食乜野個問題，好感謝好多黃店都做學生餐，甚至唔洗錢請學生食飯。當然，唔係個個一落街就話搵到間提供免費學生餐嘅餐廳架嘛。所以，其實消費分開黃同藍，係提醒大家日常生活中都需要抗爭，都需要覺醒。唔係食下食下，用下用下，咁就一世。
今次如果唔係經過大家話罷食罷買，又點會知道原來自己咁多日常生活都被另一顏色嘅群眾控制左? 連你嘅日常生活咁小事都無得選擇，你仲可以點樣選擇你理想嘅政府? 可能故意去選擇一間黃店相對上時間成本高左，但我相信以香港人排喜茶都排到3個鐘嘅精神，遊行時塞住喺公園2個鐘都未行得，都忍耐到嘅話，香港咁多同路人應該總有一間喺左近，請俾d耐性去支持下佢地!! 平時中午食飯、約朋友晚飯，都盡量揀返同自己同路嘅，偶然趕時間真係無辦法先去幫襯非同路人，但係生活上要提醒自己：「你係有得揀架！」。
所以，黃色經濟圈係work嘅，只係睇大家分唔分辨到，同埋大家嘅堅持度有幾高！
